चितवन : चितवन मेडिकल कलेजमा उपचाररत दुईजना कोरोना संक्रमितको ज्यान गएको छ । ज्यान गुमाउनेमा एकजना रत्ननगर,चितवनका रहेका छन् भने अर्का रुपन्देहीका हुन् ।
अस्पतालका अनुसार रत्ननगर नगरपालिका वार्ड नम्बर ९ का ८८ वर्षीय कोरोना संक्रमित पुरुषको मृत्यु भएको हो । उच्च रक्तचाप र मधुमेहको समस्या भएका उनी अस्पतालमा कात्तिक ११ गते भर्ना भएका थिए । उनको स्वाब परीक्षण गर्दा १२ गते कोरोना पुष्टि भएको थियो । अस्पतालको कोभिड आईसीयू कक्षमा उपचाररत उनको आज बिहान ६:५४ मृत्यु भएको अस्पतालका प्रेस संयोजक डा. किशोर अधिकारीले जानकारी दिए ।
यस्तै रुपन्देही जिल्ला बुटवल उपमहानगरपालिका ८ का ८४ वर्षीय पुरुषको कोरोना संक्रमणबाट मृत्यु भएको छ ।
अस्पतालका अनुसार उनी कात्तिक ३ गते कोरोना पुष्टि भएर ११ गते अस्पताल भर्ना भएका थिए । ज्वरो, उच्च रक्तचाप र श्वासप्रश्वासको समस्या भएका उनको गएराति ११:४७ बजे मृत्यु भएको डा. अधिकारीले जानकारी दिए । उनको स्वास्थ्यमा जटिल समस्या भएपछि कोभिड आईसीयू कक्षमा राखेर उपचार हुँदै आएको थियो ।
