२६ असोज, काठमाडौं। पृथ्वीमा अरबौँ खरबौँ जिवजन्तुहरु छन् । सबैको जन्म, मृत्यु तथा उमेरको अभिलेख राख्ने कुरा कल्पना बाहिरको कुरा हो । तर वैज्ञानिकहरुले एउटा झण्डै दुई सय वर्ष उमेरको कछुवाको चाहीँ जन्मकुण्डली नै उतारेका छन् ।
यो कछुवामा पृथ्वीमा अहिलेसम्म रेकर्ड गरिएको मध्ये सबैभन्दा धेरै उमेरसम्म बाँचेको जिव हो । यो कछुवाको उमेर १ सय ८९ वर्षको छ । सेसेल्स प्रजातिको उक्त कछुवाको नाम जोनाथन हो ।
दक्षिण आन्ध्र महासागरीय टापु सेन्ट हेलेनामा रहेको यो कछुवाले दुईवटा विश्वयुद्ध, आर्थिक महामन्दी, घातक स्पेनिस फ्लू महामारी देखि कोरोना भाइरस महामारीको यूग समेत भोगेको छ । मानिसका कैयन् पुस्तालाई विदा गरिसकेको यो कछुवा अझै स्वस्थ छ ।
हिन्द महासागरको सेसेल्समा रहेको यो कछुवालाई सन् १८८२ मा अन्य ३ कछुवासँगै सेन्ट हेलेना ल्याइएको थियो । त्यसबेला जोनाथनको उमेर ५० वर्षको थियो। अर्थात् जोनाथनको जन्म सन् १८३० मा भएको हो ।
सन् १९३० को दशकमा सेन्ट हेलेनाका गभर्नरले यो कछुवाको न्वारान गरेका थिए ।
यो कछुवा सेन्ट हेलेनाका गभर्नरको सरकारी आवास प्लान्टेसन हाउस परिसरमा बस्दै आएको छ र यसको सरकारी कर्मचारीहरुले विशेष हेरचाह र स्याहार सुसार गर्ने गर्दछन्।
यो निकै दुर्लभ प्रजातिको कछुवा हो । कुनैबेला लोप भएको ठानिएको सेसेल्स जाएन्ट प्रजातिको कछुवाको संख्या हाल झण्डै ८० वटा रहेको अनुमान छ । यो प्रजातिको कछुवाको औषत उमेर डेढसय वर्ष हो ।
